Бонки ҷаҳонӣ дар вилояти Хатлони Тоҷикистон рӯзи 25 сентябр татбиқи барномаи наверо шурӯъ кард, ки таъмини об ва меъёрҳои беҳдорӣ ё санитарияро дар манотиқи деҳот дар назар мегирад. Тарҳе бо арзиши 58 миллион доллар ба ҳукумати Тоҷикистон ба ҳайси грант ё кӯмаки бебозгашт дода мешавад ва қарор аст дар давоми панҷ соли оянда дар вилояти Хатлон мушкили дастрасии манотиқи деҳот бо оби тоза ҳалли худро пайдо кунад.

Тарҳи мазкур таъмини 400 ҳазор аҳолӣ бо оби поки ошомиданӣ ва сохтмони нуқтаҳо ё макони гигиенаву тозагӣ ваё ташноб барои 100 ҳазор кӯдаку наврасро дар назар мегирад. Масъулини Бонки ҷаҳонӣ мегӯянд, ки иншооти санитарӣ дар 200 мактаб ва марказҳои саломатӣ дар ҳудуди вилояти Хатлон бунёд ё барқарор мешавад.

Нигина Алиева, сухангӯи дафтари Бонки ҷаҳонӣ дар Тоҷикистон рӯзи 26 сентябр ба Радиои Озодӣ гуфт, ки иҷрои лоиҳа аз шаҳри Бохтар – маркази маъмурии вилояти Хатлон оғоз шуд. Нигина Алиева гуфт, ки лоиҳа шаш ноҳияи водии Вахш ва як ноҳияи минтақаи Кӯлобро фаро мегирад. Ӯ гуфт:

“Лоиҳа аз ҳисоби маблағҳои грантии анҷумани байналмилалии рушд сарпарастӣ мешавад. Ҳадафаш беҳтар кардани хизматрасонии обтаъминкунӣ ва санитарӣ дар минтақаҳои камбизоати Хатлон мебошад. Лоиҳа тоза оғоз шуда, дар панҷ соли оянда амалӣ мешавад.”

Бар асоси ин лоиҳа, қарор аст масъалаи дастрасии мардум ба оби поки ошомиданӣ дар ноҳияҳои Вахш, Леваканд (собиқ Сарбанд), Кушониён (собиқ Бохтар), Дӯстӣ (Ҷиликӯл), Ҷалолиддини Балхӣ (собиқ Ҷалолиддини Румӣ), Ҷайҳун (Қумсангири пешин) ва ноҳияи Восеъ амалӣ шавад. Бар асоси барнома, назорати иҷрои тарҳро вазорати молия, Корхонаи воҳидии давлатии “Хоҷагии манзилию комуналӣ” ва ниҳодҳои дигари давлатӣ ба ӯҳда мегиранд.

Ҷамшед Табарзода, директори генералии Корхонаи воҳидии давлатии “Хоҷагии манзилию комуналӣ” дар суҳбат ба Радиои Озодӣ лоиҳаро барои рушди деҳот ва зиндагии мардум муҳим хонда гуфт, ки бо пули Бонки ҷаҳонӣ таъмини истгоҳҳои обкашонӣ ва азнавсозии лӯлаҳои обгузар дар назар аст:

“Бо ин грант техникаҳо харидорӣ меашвад, қубурҳои обгузаре, ки 50 ва 70 сол хизмат кардаанд, иваз карда мешаванд. Қубурҳои обкашонӣ дар шаҳру навоҳӣ таъмин мешаванд. Харидории таҷҳизот дар назар аст, ки мардумро ба оби тозаи ошомиданӣ таъмин кунад. Дар баъзе деҳаҳо умуман хаттӣ обкашонӣ нест, ки онҳоро ба хатти об таъмин мекунад.”

Роҳандозӣ шудани тарҳи навсозии системаи обтаъминкунӣ дар Хатлон дар ҳолест, ки мушкили дастрасӣ ба оби поки ошомиданӣ яке аз сангинтарин мушкилоти деҳоту шаҳрҳои Тоҷикистон баъди касби истиқлол шудааст. Бар асоси ҳисобҳои мухталиф, аз 40 то 50 дар сади аҳолии Тоҷикистон бо дастрасӣ ба оби поки ошомиданӣ мушкил доранд.

Дар ҷамоати деҳоти “Машъал”-и ноҳияи Вахш чанд деҳоте ҳаст, ки онҷо оби ошомиданӣ нест ва заминҳои зиёде ба хотири набудани об кишт намешаванд. Сокинон як тонна обро бо қимати беш аз 150 сомонӣ мехаранд. Қарор аст қубурҳои обгузар ба ин ҷо ҳам кашида шаванд.

Дар Тоҷикистон як нерӯгоҳи нави барқи обиро ба кор андохтанд, ки мумкин аст, таъмини кишвар бо нерӯи барқро андаке беҳтар кунад.

Неругоҳи “Себзор” дар ноҳияи Роштқалъаро рӯзи 26 июн бо ҳузури раиси ҷумҳур Эмомалӣ Раҳмон мавриди баҳрабардорӣ қарор доданд. Нерӯгоҳи иборат аз се агрегат ва 11 мегаватӣ қодир ба таъмини 220 000 нафар бо нерӯи барқ аст.

Дафтари матбуоти раёсати ҷумҳурии кишвар бо нашри як баёнияи расмӣ гуфтааст: “Мавриди истифода қарор гирифтани Неругоҳи Себзор имкон фароҳам овард, ки дар Бадахшон истеҳсоли неруи барқ 25 фоиз зиёд ва эътимоднокию сатҳи таъминоти барқ беҳтар шавад.”

Сохтмони нерӯгоҳ, ки бо ҷалби сармояи хориҷӣ ҳам сохта шудааст, соли 2015 оғоз ёфт. Дарозии сарбанди неругоҳ 65 метр ва баландиаш 8.5 метр аст. Тоҷикистон агарчӣ дар фасли тобистон нерӯи барқи беш аз эҳтиёҷи худ тавлид мекунад, аммо ҳар мавсими сармо мардум нерӯи барқро дар соатҳои муайян мегиранд ва ҳукумат барои ин кор пайваста танқид мешунавад.

Мақомоти қудратии Арманистон 14 нафар, азҷумла чанд мунтақиди ҳукуматро бо иттиҳоми талоши табаддулоти давлатӣ боздошт кардаанд. Дар миёни онҳо як руҳонии мунтақиди ҳукумат низ ҳаст.

Никол Пашинян, нахуствазири Арманистон гуфт, ки мақомоти қудратӣ аз як табадуллот пешгирӣ карданд. Пашинян доираҳои ҷиноятӣ ва руҳониёнро дар ин кор муттаҳам кард. Мухолифони ҳукумат ин боздоштҳоро таъқиби сиёсӣ гуфтанд.

Аз субҳи барвақти 25-уми июн пулис дар манзили аъзоёни ҷунбиши “Муборизаи муқаддас” кофтукоб анҷом дод. Роҳбари ин ҷунбиш усқуф ё руҳонии шинохта Баграт (Галстанян) ба Кумитаи тафтишотӣ бурда шудааст. Ба ғайр аз ин, Артур Саркисян, вакил аз ҳизби мухолифин низ боздошт шудааст. Тарафдорони мухолифин дар назди бинои Кумитаи тафтишот ҷамъ шуданд.

Пештар нашрияи армании Civic гузориш дод, ки ба дасти онҳо нақшаи табаддулот расидааст, ки аз сӯи мухолифин омода шуда буд. Саҳифаи нахуствазири Арманистон ҳам ин хабарро нашр кард. Вале Элинар Варданян, вакил аз ҳизби мухолифин гуфт, тафтиш ва боздоштҳои ахирро таъқиби сиёсӣ аст.

Дар Тоҷикистон меъёри андози аксиз барои маҳсулоти аз тамоку истеҳсолшаванда, аз ҷумла, сигор ду баробар зиёд шуд. Қарори ҳукумат дар ин бора охири моҳи май тасвиб шудааст.

Бар асоси тартиби нав, минбаъд аз ҳазор дона сигор ё маҳсулоти ивазкунандаи он, 17 евро (195 сомонӣ) андози аксиз ситонида мешавад. То ин вақт аксиз барои ин намуд маҳсулоти тамоку 8,5 евро (97 сомонӣ) буд.

Инчунин минбаъд аз ҳазор дона сигарет 19 евро ( 218 сомонӣ) андози аксиз гирифта мешавад. Қаблан ҳаҷми ин навъ молиёт барои сигарет 9,8 евро (112 сомонӣ) буд.

Ҳукумати Тоҷикистон бори ахир соли 2018 меъёри андози аксиз барои сигор ва сигаретро боло бурда буд. Аксиз молиёт ё андозе аст, ки асосан барои маҳсулоти барои саломатӣ зиёновар пешбинӣ шудааст.

То ҳол дар Тоҷикистон барои машрубот, тамоку ва иртиботи мобилӣ аксиз муқаррар шудааст. Ҳукумат ахиран барои нӯшобаҳои нерудиҳанда ҳам андози аксиз ҷорӣ кард.

Ҳукумати Тоҷикистон дар бахши ҳавонавардӣ сиёсати "Осмони боз"-ро эълон кардааст. Қарори ҳукумат 12-уми июн тасвиб шуда, Радиои Озодӣ ду ҳафта баъд бо нусхаи он шинос шуд.

Бар асоси тартиби нав, Тоҷикистон низоми паритет ё баробарӣ дар парвозҳоро бекор мекунад. Қаблан парвозҳо ба Тоҷикистон ё аз инҷо ба дигар кишварҳо, миёни ширкатҳои ҳавопаймоии Тоҷикистон ва ширкатҳои давлати дигар баробар тақсим мешуд.

Бар асоси қарори ҳукумат, инчунин бисёр маҳдудиятҳо барои ширкатҳои ҳавопаймоии хориҷӣ бекор карда мешавад. Аз ҷумла, ҳамаи маҳдудиятҳо дар зичии парвозҳо ва ё шумораи ҷойҳои нишаст, шумораи таъинот дар хатсайр, маҳдудиятҳои тарифӣ барои интиқоли байналмилалии ҳавоӣ ва маҳдудиятҳо барои шумораи ширкатҳои ҳавопаймоӣ аз байн бурда мешаванд.

Вале дар қарори ҳукумат ишора шудааст, ки баъзе маҳдудиятҳо феълан боқӣ мемонанд. Азҷумла низоми паритет ё баробарӣ дар парвозҳо дар 18 самт то се соли дигар боқӣ мемонад. Ин 18 самтро Оҷонсии авиатсияи шаҳрвандӣ маълум мекунад. Мақомот гуфтанд, маҳдудиятҳо дар ин 18 самт баъди се сол пурра аз байн мераванд.

"Осмони боз" як таҷрубаи байналмилалӣ аст, ки назорати давлатро бар таъйини хатсайрҳо, нархи билети парвоз ва бисёр маҳдудиятҳо аз байн мебарад.

Масъалаи ҷорӣ кардани низоми "Осмони боз" дар Тоҷикистон ҳанӯз соли 2018 дар як ҷаласаи шӯрои машваратии беҳтар кардани фазои сармоягузорӣ бо ҳузури раисҷумҳур Эмомалӣ Раҳмон садо дода буд. Он замон президент ба Оҷонси ҳавонавардӣ супориш дода буд, ки барои амалӣ кардани ин сиёсат ва бештар кардани хатсайрҳои ҳавоӣ чораҳои зарурӣ андешад.

Бархе коршиносон қаблан ба Радиои Озодӣ гуфта буданд, инҳисорталабон ё монополистони бозори ҳавоӣ дар кишвар иҷозаи пурра амалӣ шудани низоми "Осмони боз"-ро шояд надиҳанд.

Пит Ҳегсет, вазири дифои Амрико гузоришҳои беруномада аз як арзёбии ҳукуматӣ дар бораи зарбаҳо ба се таъсисоти атомии ураниум дар Эронро тасдиқ кард, вале онҳоро «ибтидоӣ» ва «начандон боварибахш» номид. Пештар аз ин чанде аз расонаҳои амрикоӣ бо такя ба афроди огоҳ аз ин арзёбӣ навиштанд, ки бомбборони се маркази асосии атомии Эрон барномаи ҳастаии ин кишварро фақат барои чанд моҳ ба ақиб андохтаанд.

Раиси ҷумҳур Доналд Трамп ва Пит Ҳегсет, ки рӯзи 25-уми июн дар ҳошияи нишасти НАТО дар шаҳри Гаагаи Ҳолланд бо хабарнигорон суҳбат мекарданд, қаблан гузоришҳои расонаҳоро ғаразмандона хонданд. Ҳарду барои ширкат дар нишасти НАТО ба инҷо омадаанд. Пит Ҳегсет гуфт, ки FBI ва ё Хадамоти Таҳқиқоти Федеролии Амрико ба тафтиши он мепардозад, ки чӣ гуна арёзбии Хадамоти Иттилоотии Дифоии Амрико, як шохаи вазорати дифо ба дасти расонаҳое ба мисли См Эн Эн, Ню Йорк Таймс, Вашингтон Пост ва Рейтерс афтодааст.

Дар арзёбӣ омадааст, ки бомборони се таъсисоти атомии Эрон ва аз ҷумла таъсисоти зеризаминии ғанисозии ураниуми Форду натавонистааст, таркибҳои асосии барномаи атомии Эронро нобуд кунад, баръакси гуфтаи Доналд Трамп, ки гуфт, ҳамлаҳо таъсисоти ғанисозии атомии Эронро “комилан ва батамом” аз байн бурдаанд.

Доналд Трамп ба хабарнигорон дар Гаага гуфт, агарчӣ “арзёбӣ ба хулосаи ниҳоӣ нарасидааст, аммо ба бовари ӯ садамаҳо “бисёр сахт” будаанд. Доналд Трамп гуфт, ки таъсисот “батамом нобуд шудаанд” ва ҳамлаҳо барномаҳои атомии Эронро “даҳсолаҳо” ба ақиб андохтанд. Ӯ афзуд: “Онҳо солҳои дароз бомб сохта наметавонанд.”

Аз замони бомбборони 21-уми июн аз тарафи Иёлоти Муттаҳида, набуди иттилооти дақиқ аз натиҷаи ҳамлаҳо боиси гумоназаниҳо дар бораи таъсиру самари амалиёт шудааст. Ҳавопаймоҳои Амрико шаби 21-уми июн ба се иншооти ҳастаии Эрон - Форду, Натанз ва Исфаҳон бомбҳои азиме андохтанд. Трамп ин ҳамлаҳоро "бисёр муваффақиятомез" номид.

Порлумони Қирғизистон қонунеро қабул кард, ки бар асоси он ширкатҳои дастраскунандаи интернет вазифадоранд, дастрасӣ ба вебсайтҳои порнографиро ба тамом қатъ кунанд.

Дар қонуне, ки вакилони мардумии ҳамсоякишвари Тоҷикистон рӯзи 25-уми июн қабул карданд, мафҳуми “муҳтавои дорои таркибҳои порнографӣ” тасдиқ ва нашри он дар Қирғизистон манъ шудааст.

Дар сурати риоят накардани қонун провайдерҳо ва ё таъминкунандагони интернет ҷарима ва ё аз ҳаққи кор маҳрум мешаванд. Ба қавли вакилон, ҳадаф аз қабули қонун, “ҳифзи арзишҳои ахлоқӣ ва маънавии ҷомеа” дар Қирғизистон аст.

Марлен Маматалиев, яке аз муаллифони қонун гуфтааст: “Мо имкон фароҳам мекунем, ки ингуна муҳтавои ғайриахлоқӣ, ки бо арзишҳои мардуми мор мувофиқ нестанд ва ба насли ояндаи кишвар зарар мерасонанд, дастнорас карда шавад. Ман медонам, мо ин вебсайтҳоро дар як рӯз баста наметавонем, вале ин қадами аввал аст.”

Азамат Асанов, муовини раиси Хадамоти назорат бар соҳаи мухобирот дар Қирғизистон гуфтааст, ки провайдерҳо қодир ба дастнорас кардани вебсайти муайяне ҳастанд, вале имкони дастрасӣ ба ба онҳо аз тариқи VPN эҳтимол дорад.

Дар яке аз ҷумҳуриҳои умдатан мусулмоннишини Русия даҳ нафареро муҳокима мекунанд, ки мисли Толибон дар Афғонистон мардумеро, ки бар тибқи фармудаҳои шариат рафтор намекардаанд, ҷазо медоданд.

Бино ба гузориши Телевизиони «Настояшее Время» онҳо ба таъсиси созмони ифротгаро муттаҳам мешаванд. Раёсати тафтишот дар вазорати корҳои дохилии Ҷумҳурии Қабардину Балқар тафтишипарвандаи ин 10 нафарро рӯзи 24-уми июн ба поён расонда барои муҳокима ба додгоҳ фиристодааст.

Раҳбар ва муассиси ин гурӯҳ Асхат Чеченови 41-сола будааст. Онҳо ба “даъвати оммавӣ ба фаъолияти экстремистӣ” ҳам гумонбар дониста шудаанд. Ин афрод худро нозирони шариат медонистанд ва ба гуфтаи муфаттишон аз соли 2017 то 2023 сокинонеро, ки мутобиқ бо ақидаҳои ифротии динии онҳо зиндагӣ намекарданд, «ҷазо медодаанд.»

Аз ҷумла онҳоро калтаккӯб мекардаанд ва ё фишори равонӣ меовардаанд, ки мутобиқ ба хостаҳои онҳо ва «бар тибқи қонунҳои шариат» зиндагӣ кунанд. Дар парванди онҳо 16 нафар ҷабрдида будаанд.

Мақомоти интизомии Исроил гуфтанд, ки ҳафт низомӣ, аз ҷумла, як афсар ва шаш сарбоз рӯзи сешанбе дар ҷануби навори Ғазза ба ҳалокат расиданд.

Дар изҳороти артиши Исроил аз рӯзи 25 июн гуфта мешавад, ки ҳамчунин дар як ҳодисаи ҷудогона, чандин сарбози дигар дар навори Ғазза захмӣ шудаанд.

Хабаргузории "Рейтерз", бо такя ба расонаҳои исроилӣ навишт, ин ҳафт низомии исроилӣ дар шаҳри Хон Юнус бар асари бомбагузорӣ шудани васоили нақлиёти онҳо, ки дар оғоз таркид ва сипас оташ гирифт, ба ҳалокат расиданд.

Ҷанг дар Ғазза 7 октябри соли 2023 бо ҳамлаи созмони фаластинии "Ҳамос" ва гурӯҳҳои ҳампаймони он ба Исроил, оғоз шуд. Дар ин ҳамла 1200 нафар кушта ва беш аз 250 нафар ба гарав гирифта шуд. Амрико ва Аврупо "Ҳамос"-ро созмони террористӣ медонанд.

Ба гуфтаи вазорати тандурустии Ғазза, ки зери назорати "Ҳамос" аст, дар ҳамлаҳои Исроил то кунун дар Ғазза беш аз 56 ҳазор нафар кушта шудаанд. Аксари ин кушташудаҳо занон ва кӯдакон мебошанд. Беш аз 2 миллион аҳолии ин минтақа беҷо шудаанд ва мардум аз қаҳтӣ ва гуруснагӣ ранҷ мебаранд.

Ба иттилои мақомоти интизомии Исроил, аз оғози моҳи июн то кунун дар ҷараёни ҷанг дар Ғазза 19 низомӣ кушта шудаанд.

Додгоҳи ноҳияи Синои шаҳри Душанбе ду наврасро аз модарашон гирифта, ба мактаб-интернат додааст.

Раёсати корҳои дохилии пойтахт бо нашри ин хабар гуфт, ин наврасон чанд маротиба барои оворагардӣ ва талбандагӣ ба идораи пулис бурда шуданд.

Назари модари ноболиғон ба ҳарфҳои мақомот маълум нест.

Дар хабарномаи расмӣ омадааст, ду наврас аз сӯи модарашон, ки зиндагии носолим дошт, ҳамеша мавриди азияту озор қарор мегирифтанд. Пулис синну сол, номи зан ва ду писарашро зикр накардааст.

Дар ҳоле, ки назари модари наврасон маълум нест, пулис ҳамчунин ӯро муттаҳам кардааст, ки фарзандонашро ба талбандагӣ маҷбур мекард.

Ин бори аввал нест, ки дар Душанбе фарзандонро аз модарашон гирифта, ба мактаб-интернати давлатӣ медиҳанд.

Моҳи апрели имсол ду кӯдаки 8 ва 10-соларо аз модарашон ҷудо карда, ба интернат доданд. Мақомот он вақт ҳам гуфта буданд, модарашон ин кӯдаконро мезад ва ба талбандагӣ мефиристод. Назари модари наврасон ба ин қазия маълум нашуд.

Кодекси оилаи Тоҷикистон ба мақомот иҷозат медиҳад, ки дар сурати аз ӯҳдаи тарбияи фарзандон набаромадани волидайн, кӯдаконро аз онҳо гирифта, ба мактабҳои давлатӣ диҳанд. Дар ин ҳолат волидайн аз ҳаққи падару модарӣ пурра маҳрум карда намешаванд.

Тоҷикистон аз созиши оташбас миёни Исроил ва Эрон истиқбол кардааст. Вазорати корҳои хориҷии Тоҷикистон шоми 24-уми июн дар изҳороти гуфт, Душанбе умед дорад, "ин созиш ба ҷанге, ки бо нақзи тамоми ҳуқуқи байналмилалӣ оғоз шуда буд, хотима мебахшад ва барои сулҳи пойдор дар Ховари Миёна заминаи мустаҳкам хоҳад гузошт".

Оташбас миёни Эрон ва Исроил аз субҳи 24-уми июн оғоз шуд, ҳарчанд ду тараф ҳамдигарро ба вайрон кардани он муттаҳам карданд. Доналд Трамп, раиси ҷумҳури Амрико чанд соат баъд аз эълони оташбас ҳам Исроил ва ҳам Эронро ба риоят накардани созиш муттаҳам кард ва бахусус аз Исроил хост, бомборони Эронро бас кунад.

Рӯзи 13 июн Исроил ба Эрон ҳамлаҳои ғофилгиронае анҷом дод ва таъсисоти атомиву донишмандони ҳастаии кишвар ва фармондеҳони низомиашро ҳадаф гирифт. Рӯзи 22 июн Амрико ҳам ба ин ҳамлаҳо пайваст ва ба се таъсисоти муҳими атомии Эрон бомбаҳои азиме андохт. Дар посух Эрон ба ду пойгоҳи Амрико дар Қатар ва Ироқ мушак партофт, ҳарчанд мақомоти Қатар гуфтанд, ин ҳамлаҳо хисороте дар пай надоштанд.

Ин даргирӣ аз ҳарду тараф даҳҳо нафарро қурбон кард. Вазири тандурустии Эрон эълом кард, ки дар ҷараёни 12 рӯзи ҷанг 606 нафар дар Эрон кушта шуда, қариб 5 ҳазор кас маҷруҳ шудааст. 107 нафар ба гузориши расонаҳои расмии Эрон дар 24 соати ахири ҷанг пеш аз ба иҷро даромадани созиши оташбас, ҳалок шуданд. Мақомоти Исроил эълом карданд, ки дар пайи ҳамлаҳои мушакии Эрон 28 исроилӣ ба ҳалокат расида, қариб якуним ҳазор кас захмӣ шудаст.

Шавкат Мирзиёев, раиси ҷумҳури Узбекистон дигарбора мақоми раиси дастгоҳи раёсати ҷумҳуриро барқарор карда ва духтараш Саида Мирзиёеваро дар ин мақом гузоштааст.

Мансаби мазкурро Шавкат Мирзиёев соли 2023 аз байн бурд ва раиси онвақта Сардор Умурзоқовро мушовири махсуси президент таъйин кард. Саида Мирзиёева аз соли 2023 дастёри раиси ҷумҳури Узбекистон аст ва то он сол, раҳбари бахши робита бо ҷомеа ва сиёсати иттилоотии дастгоҳи раёсати ҷумҳурӣ буд.

Дар Тоҷикистон ҳам сардори дастгоҳи раёсати ҷумҳурӣ Озода Раҳмон, духтари президент Эмомалӣ Раҳмон аст. Мусоҳибони бахши узбекии Радиои Озодӣ гуфтаанд, дар зинаҳои ҳукуматӣ боло рафтани Саида Мирзиёева баёнгари он аст, ки раиси ҷумҳур дар идораи давлат фақат ба хонавода ва атрофиёни наздикаш такя мекунад ва ё фарзандони худро барои мақомҳои баландтар омода месозад.

Ба гуфтаи сиёсатмадорони узбек, Мирзиёев шояд ба Қурбонгулӣ Бердимуҳаммадов, раиси ҷумҳури собиқи Туркманистон пайравӣ кунад, ки мақоми хешро ба писараш Сардор Бердимуҳаммадов дод.

Додгоҳи Гурҷистон раҳбарони се ҳизби мухолифи давлатро аз 7 то ба 8 моҳи зиндон маҳкум кардааст.

Дар муҳокима дар шаҳри Тифлис дар рӯзи 23-уми июн додрас ҳамчунин ҳарсе нафарро барои ду сол аз ҳаққи кор дар идораҳои давлатӣ маҳрум кард. Бар асоси қарори додгоҳ, Мамук Хазарадзе ва Бадри Ҷапаридзе, муассисон ва раҳбарони ҳизби Гурҷистони тавоно бояд 8 моҳ ва Зураб Ҷапаридзе, муассиси ҳизби “Гирчи” ҳафт моҳи зиндагиашонро паси панҷара сипарӣ кунанд.

Сиёсатмадорони гурҷиро бо гуноҳи наомадан ба ҷаласаи комиссияи тафтишотии порлумонӣ ҷазо додаанд, ки фаъолияти ҳукумати пешинро таҳқиқ мекард. Зураб Ҷапаридзе пеш аз эълони ҳукм дар боздошт буд.

Мамук Хазарадзе ва Бадри Ҷапаридзеро шоми 23-уми июн дар назди тарафдоронашон, намояндагони дигар нерӯҳои мухолифи давлат ва Саломе Зурабишвили, раиси ҷумҳури собиқи Гурҷистон дастгир карда, бурданд. Ҳар чаҳор сиёсатмадор мегӯянд, ки гуноҳе накардаанд ва таъқиби онҳо дорои ангезаҳои сиёсӣ аст.

Дар Тоҷикистон соли гузашта садҳо нафарро барои риоят накардани қонуни баҳсбарангез «Дар бораи танзими ҷашну маросим» ба ҷавобгарӣ кашида ва аз онҳо миллионҳо сомонӣ ҷарима ситонидаанд.

Бино ба омори расмии Додгоҳи олӣ, соли 2024 додгоҳҳои Тоҷикистон 1435 парвандаи маъмурӣ барои риоят накардани ин қонунро баррасӣ карда, бештар аз 1400 нафарро ҷарима бастаанд. Бар ибораи дигар рӯзона дар кишвар 3 нафар барои беэътиноӣ ба қонуни мазкур ҷарима шудаанд. Аз ин афрод, ки бар хилофи қонун, ҷашни бошукӯҳе баргузор кардаанд ва ё масалан “оши худоӣ” додаанд, дар умум бештар аз 11 миллион сомонӣ ва ё 1,1 миллион доллар ҷарима ситонидаанд.

Бар асоси қонун «Дар бораи танзими ҷашну маросим», ки аввалин бор соли 2007 қабул ва сипас чанд бор ислоҳ шуд, дар Тоҷикистон баргузор кардани зиёфату, ҷашнҳои бошукӯҳ, ё маъракаҳои ҳоҷизиёрат, ҳоҷиталбон манъ аст.

Қонуни мазкур баъди қабул баҳси зиёдеро дар ҷомеа барангехт, чун иддае онро дахолати давлат ба зиндагии шахсии мардум меномиданд. Ҳукумат мегуфт, ҳадаф аз қабули қонун “ҳифзи арзишҳои асили фарҳанги миллӣ, пешгирии хурофоту таассуб, баланд бардоштани сатҳи иҷтимоию иқтисодии зиндагии мардуми Тоҷикистон аст.”

Кумитаи тафтишотии Русия парвандаи ҳамла ба толори консертии "Крокус"-ро ба додситонӣ фиристодааст, то онро ба додгоҳ ирсол кунад.

Дар доираи ин парванда 19 нафар боздошт шудаанд, ки аксарашон шаҳрвандон ё зодагони Тоҷикистон ҳастанд.

Аз ҷумла, мақомоти Русия мегӯянд, чор иҷрокунандаи асосии ҳамла Далерҷон Мирзоев, Муҳаммадсобир Файзов, Фаридуни Шамсиддин ва Саидакрам Раҷабализода шаҳрвандони Тоҷикистон ҳастанд. Дар Тоҷикистон бисёриҳо бо ишора ба номувофиқатӣ ва эътирофҳои зери шиканҷа ба фарзияи расмии Русия шубҳа доранд.

Кумитаи тафтишотии Русия эълон кардааст, ки ҳамла ба толори консертии "Крокус" аз сӯи мақомдорони украинӣ тарҳрезӣ шудааст. Киев қаблан ҳамагуна даст доштан дар ин ҳамларо рад карда буд. Баръакс гуруҳи тундрави "Давлати исломӣ" бо нашри навори ҳамла, масъулияти ҳодисаро ба дӯш гирифт.

Кумитаи тафтишоти Русия мегӯяд, тафтишот алайҳи ду ташкилкунандаи ин ҳамла ва чор ширкатдори эҳтимоли он идома хоҳад кард. Ин афрод таҳти таъқиб буда, вале номашон ифшо намешавад.

Поёни моҳи апрел мақомоти ҳифзи қонуни Русия гуфтанд, ки парвандаи гумонбарони ҳамла ба "Крокус Сити Ҳол"-ро моҳи июн ба додгоҳ мефиристанд. ТАСС навишт, парвандаро Додгоҳи ҳарбии 2-юми ҳавзаи ғарбӣ баррасӣ хоҳад кард.

Дар ҳамла ба "Крокус" 145 нафар куштаву беш аз 500 кас захмӣ гардид.

Вазорати молияи Тоҷикистон мегӯяд, соли гузашта 21 корхонаи давлатӣ, бахусус корхонаҳои азим фаъолияти худро бо маблағи умумии 2.3 миллиард сомонӣ ва андаке бештар аз 230 миллион доллар зарар ҷамъбаст кардаанд.

Дар ин миён ширкати “Барқи Тоҷик” дар мақоми аввал аст, ки 1 миллиарду 700 миллион сомонӣ на фоида, балки зиён дидааст. Яке аз бузургтарин корхонаҳои саноатии Тоҷикистон, яъне “Ширкати Алюминийи Тоҷик” ҳам фаъолияти хешро дар соли 2024 бо андаке бештар аз 180 миллион сомонӣ зарари иқтисодӣ ҷамъбаст кардааст.

Дар гузориши вазорати молия дар бораи фаъолияти корхонаҳои давлатӣ, ки Радиои Озодӣ ҳам нусхае аз онро рӯзи 23-уми июн дид, омадааст, “яке аз сабабҳои асосии бо зарар ҷамъбаст намудани фаъолияти молиявии корхонаҳо, афзоиши хароҷот, аз ҷумла хароҷот вобаста ба истеҳсоли маҳсулот, таъмирҳои ҷорӣ, хариди таҷҳизоту васоили ғайрисоҳавӣ, хароҷоти хоҷагидорӣ ва ба ин монанд дигар хароҷотҳои бесамар, ба шумор меравад.”

Бар асоси таҳлили вазорати молияи Тоҷикистон, корхонаҳои давлатӣ дар солҳои 2023-2024 барои корҳои сохтмонии ғайрисоҳавӣ маблағи, ободкорӣ ва барномаҳои иҷтимоӣ ва хайрия бештар аз 224 миллион сомонӣ харҷ кардаанд.

Созмонҳои байналмилалии молӣ, ки ба Тоҷикистон дар ислоҳоти иқтисодӣ ва босамар кардани кори ширкатҳои азим кӯмак мекунанд, борҳо аз ҳукумат хостаанд, фаъолияти ин муассисаҳоро шаффоф созад ва дар бораи аҳволи иқтисодии онҳо гузориш диҳад. Қарзҳои баъзе аз ин корхонаҳо сабаб шудааст, ки онҳо дар баргардонидани қарзҳои боимтиёзи созмонҳои байналмилалӣ ҳам таъхир кунанд.